ДУШАНБЕ, 6 фев – Sputnik. Барои устувории қурби пули миллии Тоҷикистон ва ҷилавгирӣ аз ҷаҳиши нархи асъори хориҷӣ бояд тавлидоти дохилӣ рушд кунад.
Ин нуктаро раиси "Амонатбон", Сироҷиддин Икромӣ зимни нишасти матбуотӣ баён дошт.
Ба гуфтаи ӯ, болоравии қурби доллару рубл аз бозори байналмилалии ҷаҳонӣ вобастагӣ дошта, ба як кишвари алоҳида рабт надорад.
Икромӣ таъкид намуд, ки низоми бонкии кишвар пеш аз ҳама барои устувору тоза нигоҳ доштани қурби пули миллӣ муваззаф аст.
Ӯ зикр намуд, ки қурби як доллари амрикоӣ то марти 2022 то 13 - 14 сомонӣ боло рафт, аммо дар натиҷаи чорабиниҳои Бонки миллию блоки иқтисодии ҳукумат поин оварда шуд.
Вай чунин ҳолатро бори аввал тайи солҳои охир дар иқтисоди кишвар муаррифӣ карда, илова намуд, ки дар натиҷа сатҳи таваррум низ поин оварда шуд. Агар солҳои қаблӣ таваррум то 7 -8% боло мерафт, дар соли 2022 ҳудуди 4,2% шуд, гуфт Икромӣ.
Раиси "Амонатбонк" таъкид намуд, ки роҳи устувор нигоҳ доштани қурби пулли миллӣ ва ҷилавгирӣ аз ҷаҳишҳои асъори хориҷӣ ин пеш аз ҳама рушди истеҳсолоти дохилӣ мебошад.
Наход макаронру собун ба Тоҷикистон аз хориҷа ворид карда шаванду асъор аз дохил барои хариди он равона гардад, суол гузошт ӯ.
Вай афзуд, мушкилоти марбути асъори хориҷӣ дар сурати саноатикунонии босуръати кишвар ва тавлиди маҳсулоти асосии ниёзи мардум дар дохил, аз байн хоҳад рафт.