ДУШАНБЕ, 31 янв — Sputnik. Тоҷикистон ба нақша гирифтааст, ки истихроҷи нафту газро рушд диҳад ва бо ин мақсад бо шариконаш гуфтушунид дорад, гуфт вазири энергетика ва захираҳои оби кишвар Далер Ҷумъа.
Ҷумҳурӣ ният дорад, ки истеҳсоли маҳсулоти нефтро рушд диҳад, зеро сарфи назар аз афзоиши солонаи истеҳсол ва истихроҷи нефту газ дар кишвар ин ҳаҷм ҳанӯз кам аст.
"Мо ҳамзамон барои истихроҷ ва истеҳсоли нафту газ дар Тоҷикистон сармоягузорӣ ҷалб карда истодаем ва дар ин бора бо шарикон музокира дорем", - гуфт вазири энергетика.
Далер Ҷумъа зикр кард, ки вазорат дар якҷоягӣ бо ширкатҳои дар ин бозор фаъолиятдошта корҳои иктишофиро идома медиҳад.
"Ба шарофати ин лоиҳаҳо мо метавонем амнияти энергетикии кишварро таъмин кунем", - гуфт ӯ.
Раҳбари Вазорати энергетика таъкид кард, ки Русия яке аз таъминкунандагони аслии маҳсулоти нафтӣ ба Тоҷикистон боқӣ мемонад ва механизми интиқоли он миёни кишварҳо таҳия шудааст, ки ба таври дақиқ амалӣ мешавад.
"Тавозуни навбатии индикативӣ барои соли 2023 ба наздикӣ мувофиқа карда шуд, мо афзоиши назарраси истифодаи маҳсулоти нафту газро мебинем", - гуфт ӯ.
Илова бар ин, вазир аз масъалаи интиқоли нафту газ аз Эрон ёдовар шуд, ки дар ҷаласаи комиссияи байниҳукуматии Тоҷикистону Эрон дар Теҳрон баррасӣ шуд.