ДУШАНБЕ, 22 дек — Sputnik. Тавре мақомоти вилояти Суғд хабар додаанд, дар натиҷаи амалӣ намудани нақшаи чорабиниҳои барномаҳои соҳавию минтақавӣ давоми 11 моҳи соли 2022 дар миқёси вилоят 151 корхонаву коргоҳи нав бо фарогирии 2820 ҷойи нави корӣ ба фаъолият шурӯъ намуданд.
Дар ин бора зимни баргузории Иҷлосияи сенздаҳуми Маҷлиси вакилони халқи вилояти Суғд, даъвати шашум, ки ахиран доир гардид, гуфта шуд.
Тибқи иттилои мақомоти вилояти Суғд, дар иҷлосия зикр гардид, ки давоми 11 моҳи соли равон дар вилоят ҳаҷми истеҳсоли маҳсулоти саноатӣ ба 21759,9 миллион сомонӣ расонида шуд.
Ба иттилои манбаъ ин нишондиҳанда нисбат ба ҳамин давраи соли гузашта бо нархҳои муқоисавӣ 3595,5 миллион сомонӣ зиёд буда, суръати афзоиш бо назардошти индекси нархҳо 118,6 фоизро ташкил медиҳад.
Ҳамзамон дар вилоят аз ҷониби корхонаи муштараки “Зарафшон” корхонаи нави металлургӣ бунёд гардида истодааст, ки то имрӯз 95 фоизи корҳои он ба анҷом расонида шудаанд.
Ҳамчунин соли равон дар вилоят 12 корхонаю коргоҳи нави дӯзандагӣ бо 269 ҷойи нави корӣ ва 3 коргоҳи истеҳсоли пойафзол бо 46 ҷойи корӣ ва даҳҳо корхонаҳои дигар таъсис ёфтанд.