ДУШАНБЕ, 12 дек — Sputnik. Сарвазири Покистон, Шаҳбоз Шариф аз мақомдорони Афғонистон хост, аз рух додани тирпарониҳо дар марз ҷилавгирӣ намоянд.
Ин нуктаро сарвазир дар пайи даргирии ахири марзӣ дар наздикии гузургоҳи "Спин-булдак - Чаман", ки аз ду ҷониб куштаю маҷруҳ барҷой гузошт, баён дошт.
Шаҳбоз Шариф дар ин даргирӣ ҷониби толибҳоро муттаҳам карда, онро маҳкум намудаст.
Ба гуфтаи ӯ, нерӯҳои пулиси афғон бидуни далелу ҳадаф сӯи минтақаи Чамани Покистон оташ кушодаанд, ки дар натиҷа теъдоде аз покистониҳо куштаю маҷруҳ шуданд. Ин таассуфовар ва сазовори маҳкумияти шадид аст, афзуд ӯ.
Вай ҳамчунин навиштааст, ки ҳукумати муваққати Афғонистон бояд кафолат диҳад, ки чунин ҳодисаҳо дигар такрор намешаванд.
Намояндаи вижаи Покистон дар умури Афғонистон, Муҳаммад Содиқ низ қаблан даргириҳои мусаллаҳона миёни нерӯҳои толиб ва пулиси покистониро маҳкум намуд.
Бар асоси гузоришҳои нашркардаи ҷонибҳо дар ин муноқиша ва тирпаронӣ 6 нафар кушта ва 17 нафар захмӣ шуданд.
Артиши Покистон низ ин ҷангро маҳкум кард ва дар баёнияе ин даргириро "ҳамлаҳои бедалел" номид.
Дар ин эъломия гуфта мешавад, ки нерӯҳои толиб дар минтақаи Чаман аз силоҳҳои сангин, аз ҷумла тӯпҳо ва мушакҳо истифода кардаанд. Аз далоили ин даргирӣ сохтмони иншоот дар минтақаи аломатгузоринашудаи марзӣ аз сӯи толибҳо арзёбӣ мегардад.
Ин ҳодиса дар ҳолест, ки қаблан низ чун даргириҳо дар марз бо Покистон ва Эрон сурат гирифта буд.