ДУШАНБЕ, 7 ноя — Sputnik. Маҷлиси намояндагони Тоҷикистон лоиҳаи қонун "Дар бораи ҷовидон гардонидани хотираи ҳалокшудагон ҳангоми ҳифзи Ватан"-ро қабул кард.
Муовини якуми вазири мудофиаи Тоҷикистон, Эмомалӣ Собирзода дар шарҳи қонуни ҷадид гуфт, он ҷовидон гардонидани хотираи шахсони ҳангоми ҳифзи Ватан, ҳимояи сохти конститутсионии кишвар ва иҷрои уҳдадориҳои байналмилалӣ ҳалокшударо мушаххас кардааст.
Нашрияи парлумонии "Садои мардум" аз қавли Собирзода овардааст, ки ин кор аз ҷумла тавассути арҷ гузоштан ба шуҷоат, мардонагӣ ва қаҳрамонии онҳо, баҳисобгирӣ, ба тартиб даровардан, ҳифзу обод ва нигоҳбонӣ кардани қабрҳои ҳарбӣ, ёдгориҳои ҳарбӣ, ҷойҳои инфиҷор ё суқуткардаи техникаю ҳавопаймоҳои ҳарбӣ анҷом дода мешавад.
Гузаронидани корҳои ҷустуҷӯӣ бо мақсади пайдо кардани қабрҳои ҳарбии бақайдгирифтанашуда, муқаррар намудани маълумоти шахсии хизматчиёни ҳарбии ҳалокшуда аз муқаррароти дигар барои поси хотираи муҳофизони Ватан арзёбӣ шудаст.
"Вазорати мудофиа ва дигар сохторҳои ҳарбии кишвар баҳри ҷовидон гардонидани хотираи ҳалокшудагон, ки барои баланд бардоштани рӯҳияи ҳайати шахсии Қувваҳои Мусаллаҳи кишвар аҳамияти калон дорад, пайваста тадбирҳои зарурӣ андешида истодаанд", - гуфт Собирзода.
Аз ҷумлаи чорабиниҳои дигар барои поси хотири муҳофизони Ватан бо адои эҳтироми ҳарбӣ дафн кардани хизматчиёни ҳарбӣ, гузоштани санги қабр, сутуни ёдбуд, муҷассама дар оромгоҳҳо, ба маҳалҳо, кӯчаю майдонҳо, муассисаҳои таълимӣ ва қисмҳои ҳарбӣ гузоштани номи ҳалокшудагон, пешбурди корҳои ҷустуҷӯӣ ва баргузор намудани ҳамоишу чорабиниҳои оммавӣ дар санаҳои муҳим арзёбӣ шудаст.
Ноиби аввали вазири мудофиа муътақид аст, ки барои ташаккули мафкураи ҷамъиятӣ ва арҷгузорӣ ба корнамоӣ ва қаҳрамонии шахсони ҳангоми ҳифзи Ватан ҳалокшуда мусоидат мекунанд.