ДУШАНБЕ, 28 окт — Sputnik. Раисиҷумҳури Амрико Ҷо Байден зикри раисиҷумҳури Русия Владимир Путин аз силоҳи ҳастаиро хилофи изҳороташ дар мавриди надоштани нияти истифодаи он хонд.
Ӯ ин нуктаро зимни мусоҳиба бо шабакаи телевизионии "Newsnation" дар пасманзари изҳошроти Путин дар маҳфили мубоҳисавии "Валдай" баён доштаст.
Дар ин ҳамоиш раҳбари Русия гуфт, Маскав ба ҳамлаи ҳастаӣ ба Украина ниёз надорад. Вай аз онҳое, ки даъво доранд, ки Русия метавонад аз силоҳи ҳастаӣ истифода кунад, даъват кард, то доктринаи низомии Русияро бихонанд.
Путин таъкид намудаст, ки дар корбурди силоҳи ҳастаӣ дар Украина ҳеҷ маънии низомӣ ё сиёсӣ вуҷуд надорад ва зарурати андешидани чунин тадбирҳо низ аз ҷониби Русия нест.
Аммо роҳбари Иёлоти Муттаҳидаи Амрико дар ин зикри раисҷумҳури Русия таҳдид дидаст.
"Фикр мекунам, агар ӯ ният надошта бошад, чаро дар ин бора сӯҳбатро идома медиҳад? Чаро дар бораи имкони истифода аз силоҳи ҳастаии тактикӣ ҳарф мезанад", - суол гузоштааст Байден.
Вай ҳамчунин бархӯрди Путинро хатарнок хонда, илова намудааст, ки бо тарки Украина метавонад ба он поён диҳад.
Ин дар ҳолест, ки қаблан Маскав борҳо иддаои парокандаи ғарб дар мавриди эҳтимоли истифодаи силоҳи ҳастаиро бепояю моҷароҷӯёна хонда, аз паёмадҳои манфии он ҳушдор дод.