ДУШАНБЕ, 21 окт — Sputnik. Президенти Тоҷикистон, Эмомалӣ Раҳмон бо ирсоли паём ба сарвазири Арманистон, Никол Пашинян 30-юмин солгарди барпо намудани робитаҳои дипломатии ду кишварро шодбош гуфтаст.
Ба иттилои дафтари матбуоти раисҷумҳури Тоҷикистон, Эмомалӣ Раҳмон дар паёмаш ба Пашинян аз ҷараёни инкишофи муносибатҳои дӯстӣ миёни кишварҳо, чӣ дар асоси дуҷониба ва чӣ дар сатҳи бисёрҷониба изҳори қаноатмандӣ кардаст.
"Алоқаманди густариши рӯзафзун ва тақвияти минбаъдаи ҳамкорӣ бо Арманистон, ки бо он моро риштаҳои таърихии дӯстӣ ва ҳамкорӣ мепайванданд, ҳастем", - омадааст дар паём.
Раҳмон ба Пашинян саломатӣ, дар фаъолияти давлатиааш муваффақиятҳои назаррас ва ба мардуми дӯсти Арманистон сулҳу суботу шукуфоӣ таманно кардааст.
Сарвазири Арманистон низ дар паёми шодбошияш ба Эмомалӣ Раҳмон зикр намудаст, ки тйии се даҳсолаи гузашта муносибатҳои ду кишвар дар асоси устувори анъанаҳои дӯстӣ, эҳтироми якдигар ва ҳамдигарфаҳмии мардумон рушд ёфтаанд.
"Итминон дорам, ки муносибатҳои кишварҳои мо иқтидори назаррас доранд ва истифодаи комили он имкон медиҳад, ки ҳамкории байнидавлатии Арманистон ва Тоҷикистон ба сатҳи сифатан нав бардошта шаванд", - омадааст дар паёми Пашинян.
Вай ба Эмомалӣ Раҳомн саломатии бардавом, саодатмандӣ, муваффақият ва ба мардуми Тоҷикистон сулҳу некӯаҳволӣ ва шукуфоӣ орзу кардаст.