ДУШАНБЕ, 30 сен — Sputnik. Ярмарка-фурӯши ангишт дар шаҳрҳои Истаравшан, Хуҷанд, Конибодом ва ноҳияи Бобоҷон Ғафуров ташкил карда шудааст, иттилоъ додаст мақомоти вилояти Суғд.
Тибқи иттилои манбаъ, ярмарка-фурӯши ангишт дар ин минтақаҳо дар асоси дастур Эмомалӣ Раҳмон, раисҷумҳури кишвар ва бо ибтикори Вазорати саноат ва технологияҳои нав ба роҳ монда шудааст.
“Мақсади асоси ин таъмин ва дастрасии сокинон бо маводи сӯхти нисбатан арзон дар фасли зимистон мебошад”, - қайд кардааст манбаъ.
Манбаъ таъкид кардааст, ки ярмарка-фурӯши ангишт рӯзҳои 28, 29 ва 30 сентябр доир шуда, сокинон бо нархи 70-80 дирамӣ метавонанд ангишт харидорӣ намоянд.
Вазорати саноат ва технологияҳои нав бо мақсади иҷрои дастуру супоришҳои Президенти Тоҷикистон дар бораи таъмини талаботи аҳолии мамлакат бо ангишт дар давраи зимистони солҳои 2022-2023, инчунин ҷиҳати ба танзим даровардани нархи ин намуди маводи сӯхт дар бозор ярмарка-фурӯши ангиштро ба роҳ мондааст.
Ба иттилои мақомот чунин ярмаркаҳо имконият медиҳанд, ки сокинон барои сипарӣ намудани зимистони имсола миқдори зарурии маводи сӯхтро бо нархи чанд маротиба арзон харидорӣ намуда, захира намоянд.