ДУШАНБЕ, 28 сен — Sputnik. Нархи умумии бозигарони тими миллии футболи Тоҷикистон 100 ҳазор евро боло рафтаст, бармеояд аз додаҳои "Transfermarkt".
Бар асоси ин манбаъ, аз ҳама гаронарзиштарин, ин бозигари тими “Зубоҳан”-и Эрон Эҳсони Панҷшанбе шудаст, ки нархаш ҳудуди 700 ҳазор евро ҳисоб шудаст.
Дар ҷои дуюм Зоир Ҷӯрабоев бо 500 ҳазор евро аз тими “Сурхон”-и Ӯзбекистон ва сеюм - Рустам Ятимов бо 400 ҳазор евро аз "Истиқлол"-и шаҳри Душанбе қарор доранд.
Ҷойи чаҳорумро ҳимоятгари “Персеполис”-и Эрон Ваҳдат Хононов ва ҳамлагари “Трау”-и Ҳинд Комрон Турсунов тақсим мекунанд. Онҳо 325 ҳазор евроӣ арзиш доранд.
Бозигарони дигари тими миллӣ Шаҳром Самиев аз "Ислочи"-и Белорус, Рустам Соиров аз "Левадия"-и Эстония ва Нуриддин Ҳамроқулов аз "Хатлон" 300 ҳазор евроӣ баҳогузорӣ шудаанд.
Арзиши 250 ҳазор евро ба Амирбек Ҷӯрабоев аз "Юнайтед Сити"-и Филиппин ва Муҳаммадҷон Раҳимов аз "Истиқлол" нисбат дода мешавад.
Манучеҳр Сафаров аз "Локомотив"-и Тошканд 225 ҳазор евро, Шоҳрӯз Қирғизбоев аз "Хуҷанд" - 200 ҳазор, Аҳтам Назаров ва Шервон Мабатшоев аз "Истиқлол" - 175 ҳазор евроm нарх доранд. Арзиши Муҳриддин Ҳасанов ва Парвиз Боқи-Охунов аз "Истиқлол" 150 ҳазор евроист.
Сиёвуш Асроров, Алиҷон Кароматуллозода ва Далер Имомназаров аз "Истиқлол" ва Ҳамадони Камолов аз "Паракуэллос"-и Испания 125 ҳазор евро нарх доранд. Дар ҷамъбасти феҳраст Табрези Давлатмир аз "Истиқлол" бо арзиши 100 ҳазор евро ҷой гирифтаст.