ДУШАНБЕ, 25 сен — Sputnik. Сабқати тимҳои миллии Тоҷикистону Малайзия соати 18:30 бо вақти Душанбе оғоз мегардад.
Ба иттилои Федератсияи футболи Тоҷикистон, тимҳои мазкур дар қисмати ниҳоии 48-умин Мусобиқаи байналмилалии "King's Cup 2022" зӯрозмоӣ мекунанд.
"Дар шаҳри Чиангмайи Тайланд 25 сентябр бозии ниҳоии 48-умин мусобиқаи байналмилалии "King's Cup 2022" миёни тимҳои миллии Малайзия ва Тоҷикистон баргузор мешавад", - омадааст дар иттилоия.
Маврид ба зикр аст, ки дар даври ниманиҳоӣ мунтахаби Тоҷикистон бар Тринидад ва Тобаго бо ҳисоби 2:1 пирӯз шуд ва ба финали мусобиқа роҳ ёфт. Голҳоро Муҳаммадҷон Раҳимов ва Эҳсони Панҷшанбе ба ҳадаф расонданд. Дуввумӣ беҳтарин бозигари ин сабқат дониста шуд.
Дар бозии дигари нимниҳоӣ тими Малайзия дастаи мизбон - Таиландро шикаст дода, ба финал роҳхат гирифта буд.
Петр Сегрт, сармурабии мунтахаби Тоҷикистон гуфт, ки дастпарваронаш тамоми талошро мекунанд, ки дар ин сабқат пирӯз гарданду "King's Cup 2022"-ро ба даст биоваранд.