ДУШАНБЕ, 25 сен — Sputnik. Мулоқоти навбатии роҳбарони ҳайатҳои расмии Тоҷикистон ва Қирғизистон дар гузаргоҳи сарҳадии "Қизилбел" таҳти роҳбарии раиси КДАМ, Саймумин Ятимов ҳамтои қирғизаш, Қамчибек Ташиевбаргузор гардид.
Дар ин бора дафтари матбуоти ҳукумати Суғд хабар дода, афзуд, ки ҷонибҳо барои идомаи гуфтушунидҳо ва ҳали масъалаҳои мавҷуда бо роҳи дипломатӣ бори дигар таъкид карданд.
"Саймумин Ятимов ва Қамчибек Ташиев вобаста ба иҷрои нишондодҳои протоколи имзошуда ва таҳкими сулҳу субот дар хати сарҳади давлатии Ҷумҳурии Тоҷикистон ва Ҷумҳурии Қирғизистон мубодилаи афкор намуданд", - омадааст дар иттилоия.
Таъкид гардидаст, ки бояд тамоми техникаҳои ҳарбӣ ба маҳалли доимии худ баргардонида шуда, ҷонибҳо бо ҳусни тафоҳум мушкилоти пешояндаро ҳал созанд.
"Ҳамчунин зарур шуморида шуд, ки мардуми наздисарҳадӣ бояд равуо дошта бошанд ва муносибатҳои дӯстона миёни ду халқ чун пештара ба роҳ монда шавад. Зеро тоҷикону қирғизҳо асрҳост, ки дар канори ҳам зиндагӣ доранд", - афзуд манбаъ.
Аз ҷониби Тоҷикистон дар ин музокирот Саймуъмин Ятимов, раиси КДАМ, Азим Иброҳим, вазири нақлиёт, Рамазон Раҳимзода, вазири умури дохилӣ ва Раҷаббой Аҳмадзода, раиси вилояти Суғд иштирок доштаанд.
Расман мақомоти Тоҷикистон ҳанӯз дар мавриди тафсилоти санади нави имзошуда хабар надодаанд.
Аз ҷониби Қирғизистон Тошиев дар суҳбат бо расонаҳо эълон кард, ки сокинони беруншуда аз минтақаҳои марзӣ метавонанд ба хонаҳояшон баргарданд. Вай кафолат додаст, ки вазъ дар марз ором хоҳад буд.