ДУШАНБЕ, 6 сен — Sputnik. Иброҳим Раисӣ, раисҷумҳури Эрон ширкати худро дар нишасти сарони Созмони Ҳамкориҳои Шанхай дар Ӯзбекистон таъйид кард.
Ба гузориши хабаргузории ИРНА, Иброҳим Раисӣ қасд дорад дар нишасти рӯзҳои 15-16 сентябр дар Самарқанд ширкат кунад.
Маврид ба зикр аст, ки Эрон ба раванди пайвастан ба СҲШ, ки дар нишасти сарони ин созмон дар моҳи сентябри соли 2021 дар Душанбе тасвиб шуда буд, пардохтаст.
Ахиран Владимир Норов, иҷрокунандаи вазифаи вазири корҳои хориҷии Ӯзбекистон таъкид намуд, ки дар аҳди раёсати кишвараш дар СҲШ, Эрон узви ин созмон хоҳад шуд.
"Дар Самарқанд ҳамчунин ёддошти тафоҳум дар мавриди уҳдадориҳои Эрон ҳамчун узви Созмони Ҳамкориҳои Шанхай имзо хоҳад шуд", - гуфта буд Норов.
Мақомоти Ӯзбекистон мегӯянд, роҳбарони кишварҳои узви СҲШ ва бархе давлатҳои дигар иштирокашонро дар ҳамоиши Самарқанд тасдиқ карданд.
СҲШ созмони байналмилалӣ аст, ки соли 2001 таъсис ёфтааст. Аъзои созмон феълан Тоҷикистон, Русия, Ҳиндустон, Қазоқистон, Чин, Қирғизистон, Покистон ва Ӯзбекистон мебошанд.
Кишварҳои нозир – Афғонистон, Эрон, Муғулистон ва Беларус мебошанд. Кишварҳои шарик Озарбойҷон, Арманистон, Камбоҷа, Непал, Туркия ва Шри-Ланка ҳастанд.