ДУШАНБЕ, 2 сен — Sputnik. Беш аз 93,5%-и нерӯи барқи тавлидшуда дар Тоҷикистон дар нерӯгоҳҳои барқи обӣ истеҳсол гардидааст, хабар дод "Авесто" бо такя ба мақомоти умури энергетикаи ҷумҳурӣ.
Ба иттилои масъулин, ҳаҷми умумии тавлиди нерӯи барқ дар Тоҷикистон, тайи 7 моҳи соли ҷорӣ беш аз 12 млрду 502,7 млн кВт/соатро ташкил дод. Таъкид гардидаст, ки нишондоди тавлидоти барқ дар муқоиса бо ҳафтмоҳаи аввали соли гузашта ҳудуди 360,9 млн кВт/соат ё 3% бештар мебошад.
Дар мавриди манбаи истеҳсоли барқ таъкид шудааст, ки нерӯгоҳҳои барқӣ обӣ тайи январ - июли соли равон 11 млрду 697 млн кВт/соатро истеҳсол кардаанд.
Ин рақам беш аз 93,5%-и ҳаҷми умумии нерӯи барқ дар саросари кишварро ташкил медиҳад. Дар марказҳои барқу гармидиҳии ҷумҳурӣ тайи ҳафтмоҳа 1,1 млрд кВт/соат истеҳсол шудаст.
Дар зимн зикр шудаст, ки тавлиди гармӣ дар Тоҷикистон коҳиш ёфтааст. Аз ҷумла тайи ҳафт моҳи аввали соли ҷорӣ 675,8 ҳазор Гкал гармӣ истеҳсол шудааст, ки нисбат ба ҳамин давраи соли 2021 наздики 6% камтар аст.
Нерӯгоҳҳои офтобӣ дар Тоҷикистон ҳамагӣ 2 ҳазор кВт/соат нерӯи барқро истеҳсол кардаанд.
Ин дар ҳолест, ки қаблан хабар дода шуд, Тоҷикистон интиқоли нерӯи барқ ба кишварҳои хориҷиро афзоиш дода, дар 7 моҳи соли 2022 ба кишварҳои минтақа ба маблағи 64,5 млн доллар нерӯи барқ содир кардааст. Ҳаҷми содироти нерӯи барқ дар ҳамин давраи соли гузашта ҳудуди 55 млн доллар буд.