ДУШАНБЕ, 19 авг – Sputnik. Назарзода Турабек Камол муовини фармондеҳи Қӯшунҳои сарҳадии Кумитаи давлатии амнияти миллии Тоҷикистон оид ба корҳои сиёсӣ-тарбиявӣ таъйин гардид.
Фармон дар ин бораро Эмомалӣ Раҳмон, раисҷумҳури Тоҷикистон имзо кардааст.
Бо фармони дигар Мирзозода Сафаралӣ Раҳим аз вазифаи муовини фармондеҳи Қӯшунҳои сарҳадии КДАМ Тоҷикистон оид ба корҳои сиёсӣ-тарбиявӣ озод гардид.
Далели барканории Мирзозода гузаштан ба кори дигар гуфта шудааст, аммо тафсилоти дигар зикр нагардидааст.
Раисҷумҳури Тоҷикистон ҳамчунин Назирзода Сафаралиро муовини фармондеҳи Қӯшунҳои сарҳадии Кумитаи давлатии амнияти миллии Ҷумҳурии Тоҷикистон таъйин намудааст.
Дар баробари ин тағйироти кадрӣ дар дигар сохтору идораҳои мақомоти ҳифзи ҳуқуқ сурат гирифтааст. Дафтари матбуоти раисҷумҳури Тоҷикистон кадрҳои навтаъйинро ҷавонони болаёқат муаррифӣ кардааст.
Эмомалӣ Раҳмон дар суҳбат бо мақомдорони тозатаъйин изҳор доштааст, ки мубориза бо ҳама гуна қонуншиканиҳо пурзӯр намоянд, ба кор бо ҳисси баланди масъулият муносибат карда, барои ҳалли мушкилоту монеаи пешрафти соҳаҳои вобастагардида аз худ қобилияти хуби ташкилотчигӣ нишон диҳанд.
Раисҷумҳур таъкид намудаст, ки кадрҳои ҷавону болаёқат бо назардошти таҳдиду хатар ва ҷиноятҳои замони муосир пайваста омӯзанд ва бо истифода аз технологияи муосир сатҳи донишҳои тахассусии худро баланд бардоранд.