ДУШАНБЕ, 16 авг — Sputnik. Партобҳои иттилоотӣ дар бораи нақшаҳои Русия барои истифодаи силоҳи ҳастаии тактикӣ дар Украина дурӯғанд, изҳор дошт Сергей Шойгу, вазири дифои Русия зимни ифтитоҳи конфронси Маскав дар масоили амнияти байналмилалӣ дар чаҳорчӯби форуми "Армия-2022".
"Васоити ахбори умум дар бораи гӯиё нияти Русия барои истифодаи аслиҳаи ҳастаии тактикӣ дар ҷараёни амалиёти вижаи низомӣ ё омодагӣ ба истифода аз силоҳи кимиёвӣ ҳадсҳоро паҳн мекунанд. Ҳамаи ин дурӯғи мутлақ аст", - гуфт ӯ.
Вазир таъкид кард, ки аз нигоҳи низомӣ зарурати истифодаи силоҳи ҳастаӣ дар Украина нест.
Вай тавзеҳ дод, ки ҳадафи аслии силоҳи ҳастаии Русия ҷилавгирӣ аз ҳамлаи ҳастаӣ ба қаламрави кишвар аст.
Шойгу ёдовар шуд, ки истифодаи ин навъи силоҳ бо ҳолатҳои фавқулодда маҳдуд аст, ки "дар ҳуҷҷатҳои дастурии Русия, ки барои омма кушодаанд, муайян карда шудаанд."
Ӯ ҳамчунин иддао дар бораи эҳтимоли истифодаи силоҳи кимиёвӣ ҳангоми амалиёти вижа дар Украинаро беасос хонд.
Вай гуфт, силоҳи ҳастаӣ ҳанӯз соли 2017 дар Русия нобуд карда шуда буданд.
"Бар хилофи Иёлоти Муттаҳида, ин гуна силоҳ дар кишвари мо ҳанӯз соли 2017 дар чаҳорчӯби иҷрои ӯҳдадориҳои байналмилалӣ комилан нобуд карда шуда буданд", - гуфт Шойгу.
Дар зимн вазири дифои Русия таъкид намуд, ки истифодаи иғвогаронаи моддаҳои заҳролуд хоси созмонҳои ба истилоҳ ҷамъиятие, ба монанди "Сарпӯшҳои сафед" дар Сурия мебошад, ки аз ҷониби Ғарб сарпарастӣ мешаванд.