ДУШАНБЕ, 2 июл — Sputnik. Режими Киев дар Одесса боз як иғво омода мекунад, то Русияро дар тахриби зербиноҳои ғайринизомӣ ва куштори мардуми осоишта муттаҳам кунад, хабар медиҳад РИА "Новости".
Дар бораи иғвои дарпешистода, генерал-полковник Михаил Мизинтсев, сардори ситоди ҳамоҳангсозии байниидоравӣ оид ба вокуниши башардӯстона, сардори Маркази миллии назорати дифои Федератсияи Русия изҳор дошт.
Ба қавли ӯ, дар назар аст, ки дар яке аз иншоотҳои иҷтимоӣ тасвири бардурӯғи қурбониён ба саҳна гузошта шавад. барои ин кор аллакай шумори зиёди хабарнигорони хориҷӣ ва коркунони ЮНИСЕФ ҷалб карда шудаанд.
"Тибқи маълумоти дақиқи мавҷуда, режими Киев дар Одесса боз як иғвогарии мураккабро барои муттаҳам кардани қувваҳои мусаллаҳи Русия дар куштори ғайринизомиён (аз ҷумла ноболиғон) ва ҳадафмандона хароб кардани инфрасохтори ғайринизомӣ бо истифода аз бомбаҳои кассетӣ, ки дар созишномаҳои байналмилалӣ мамнӯъ шудааст, омода мекунад", - афзудааст Мизинтсев.
Вай қайд кард, ки барои ҳамаи иштирокчиёни саҳнаҳои сохташуда пас аз наворбардорӣ "мукофоти пулӣ ба маблағи 500 доллар пешбинӣ шудааст" ва ба ҳар кадоми онҳо аллакай 100 доллар пешпардохт шудааст.
"Мо ҷомеаи ҷаҳонӣ ва созмонҳои байналмилалиро пешакӣ огоҳ менамоем, ки дар ояндаи наздик ин ва дигар ифшоҳои қалбакӣ дар бораи "ваҳшонияти Русия" бофтаи мақомоти Киев бо дастгирии "кураторҳои" ғарбӣ дар расонаҳои хабарӣ дар назар аст. Мо бори дигар таъкид менамоем, ки дар ҷараёни амалиёти вижаи низомии қувваҳои мусаллаҳи Русия ба иншооти инфрасохтори ғайринизомӣ зарба намезананд ва ба аҳолии осоишта танҳо ба таври инсондӯстона муносибат мекунанд”, - таъкид кард генерал-полковник.
Ёдовар мешавем, ки Федератсияи Русия рӯзи 24 феврал дар Украина амалиёти вижаро оғоз кард. Путин ҳадафи онро "ҳимояи одамоне номид, ки тӯли 8 сол таҳти таъқиб ва наслкушӣ аз ҷониби режими Киев қарор гирифтаанд."
Барои ин, ба гуфтаи ӯ, дар назар аст, ки "нозизудоӣ ва ғайринизомигардонии Украина", ба ҷавобгарӣ кашидани тамоми ҷинояткорони ҷангии масъули "ҷиноятҳои хунини зидди мардуми осоишта" дар Донбасс сурат бигирад.
Нерӯҳои мусаллаҳи кишвар вазифаи асосии марҳилаи аввали амалиёти махсусро анҷом доданд. Онҳо иқтидори ҷангии Украинаро ба таври назаррас коҳиш доданд.