ДУШАНБЕ, 22 июн – Sputnik. Ин масъала ахиран зимни мулоққоти Маҳмадуллозода Нурулло, муовини вазири меҳнат, муҳоҷират ва шуғли аҳолии Тоҷикистон бо Мулугета Зевди, роҳбари Намояндагии идораи Комиссари олии Созмони Миллали Муттаҳид дар умури гурезаҳо дар Тоҷикистон баррасӣ гардид
Дар ин бора дафтари матбуоти Вазорати меҳнат, муҳоҷират ва шуғли аҳолии Тоҷикистон хабар додааст.
“Зимни вохӯрӣ ҳамкории ҷонибҳо дар татбиқи чорабиниҳои муштарак барои дастгирии иҷтимоии гурезаҳо, аз ҷумла касбомузӣ, бокортаъминсозӣ ва мутобиқшавии иҷтимоии онҳо баррасӣ гардид”, - таъкид кардааст масъулини Вазорати меҳнат.
Ҳамзамон манбаъ зикр намудааст, ки Тоҷикистон бо Комиссари олии Созмони Миллали Муттаҳид дар умури гурезаҳо ҳамкории хуб дошта, ҷумҳурӣ дар Осиёи марказӣ яке аз аввалин давлатҳоест, ки ба Конвенсияи байналмилалӣ оид ба гурезаҳо ҳамроҳ шуда, қонунгузории худро ба он мутобиқ ва ҳуқуқу манфиатҳои шахсони гурезаро эътироф ва таъмин менамояд.
Инчунин, дар ин дидор тарафҳо дар мавриди ба тақвияти ҳамкорӣ ҷиҳати ба касбомузӣ ва шуғл фаро гирифтани шахсони гуреза ба мувофиқа расиданд.