ДУШАНБЕ, 8 июн — Sputnik. Комиссияи марказии интихобот ва раъйпурсии Тоҷикистон санаи нави интихоботи миёнадавриро муайян кардааст.
Ба иттилои манбаъ, интихоби миёнадаврӣ дар ҳавзаи ҳудудии якмандатии интихоботии Фирдавсӣ, рақами 1 баргузор мешавад. Сокинони ин ҳавза метавонанд вакили навашонро рӯзи 14 августи соли равон интихоб намоянд.
Вакили қаблӣ аз ин ҳавза Насриддинзода Эмомалӣ Сайфиддин буд, ки тайи беш аз як соли охир дар мақоми ёрдамчии раисҷумҳури Тоҷикистон оид ба масъалаҳои рушди иҷтимоӣ ва робита бо ҷомеа фаъолият мекунад.
Эмомалӣ Раҳмон, раисҷумҳури Тоҷикистон моҳи майи соли гузашта Насриддинзодаро ба ҷойи Абдуҷаббор Раҳмонзода, ёрдамчии президент дар масоили рушди иҷтимоӣ ва робита бо ҷомеа таъйин намуда буд.
Насриддинзода ҳамчунин роҳбарии Кумита оид ба қонунгузорӣ ва ҳуқуқи инсонро ба уҳда дошт, ки бо таъйинаш ба мақоми ҷадид курсии вакилӣ ва роҳбари кумита холӣ монд.
Маҷлиси намояндагон, палатаи поёнии парлумони Тоҷикистон ба шумор рафта, аз 63 вакил иборат мебошад, ки дар 5 сол як бор аз тариқи интихоботи умумӣ бо овоздиҳии пинҳонӣ интихоб карда мешаванд. Маҷлиси намояндагон дар Тоҷикистон доимамалкунанда ва касбӣ мебошад.
Интихоботи охири парлумонӣ дар Тоҷикистон 1 марти соли 2020 баргузор гардида, аксари курсиҳои Маҷлиси намояндагони ҷумҳуриро намояндагони Ҳизби ҳокими халқии демократӣ соҳиб шуданд, ки роҳбарии онро раисҷумҳур Эмомалӣ Раҳмон ба уҳда дорад.