ДУШАНБЕ, 26 май — Sputnik. Президенти Тоҷикистон Эмомалӣ Раҳмон дар доираи сафари корияш ба ноҳияи Шамсиддини Шоҳин бо фаъолони деҳоти Нуриддин Маҳмудов суҳбати сарироҳӣ анҷом дод.
Бино ба гузориши хадамоти матбуотии президенти Тоҷикистон, дар ин мулоқот кишвардор аз авзои имрӯзаи ҷомеа гуфта, ба зиёд кардани майдони кишт таъкид кардааст.
Президенти Тоҷикистон ҳамчунин яке аз роҳҳои беҳтар намудани зиндагиро ба мардуми ноҳияи Шамсиддини Шоҳин нишон додааст.
Ба гуфтаи кишвардор, истифодаи пурсамар аз гулу гиёҳҳои шифобахш дар кӯҳҳои ин мавзеъ ҳам яке аз роҳҳои муассири беҳтар намудани зиндагии сокинони деҳот мебошад.
Эмомалӣ Раҳмон бо назардошти имконоти васеи деҳоти Нуриддин Маҳмудов дар самти боғпарварӣ ва афзоиш додани ҳаҷми истеҳсоли мева ба масъулони ноҳия ҷиҳати дастгирии иқдомҳои сокинон дар самти хушконидан ва роҳандозии содироти он ба кишварҳои хориҷи дуру наздик дастуру супоришҳои мушаххас додааст.
Раисҷумҳур ҳамзамон сокинонро ба тарбияи фарзандон дар рӯҳияи ватандӯстию хештаншиносӣ ва касбу ҳунардӯстӣ даъват намуда, риояи талаботи Қонун "Дар бораи танзими анъана ва ҷашну маросим дар Ҷумҳурии Тоҷикистон"-ро омили муҳими пешгирӣ аз исрофкорӣ гуфтааст.
Омори деҳоти Нуриддин Маҳмудов
Деҳоти Нурриддин Маҳмудови ноҳияи Шамсиддини Шоҳин дорои наздики 7 ҳазор нафар аҳолӣ буда, дар он 713 хоҷагии деҳқонӣ фаъолият мекунад.
Дар ин деҳот 8 муассисаи таълимӣ, 4 кӯдакистон, 1 беморхона ва 7 бунгоҳи тиббӣ фаъол аст.
Феълан дар ҳудуди ин ҷамоат 5 корхонаи истеҳсолӣ сабти ном шудааст.