ДУШАНБЕ, 15 май — Sputnik. Абубакр Шеров, ҷудокори ҷавони Тоҷикистон дар вазни то 66 кило соҳиби Ҷоми Осиё миёни ҷавонон ва наврасон шуд.
Шеров дар мусобиқаи Ҷоми Осиё миёни наврасон ва ҷавонон ба хотири Бакет Махмутов, ходими намоёни варзиши қазоқ, ҳамаи ҳарифонашро шикаст дод.
Дар даври ниҳоӣ паҳлавони тоҷик бо ҷудокори ӯзбекистонияш, Азизбек Ортиқов воридид майдон шуда, бо истифода аз усули осайикоми рақибро мағлуб кард.
Ба иттилои Кумитаи миллии олимпии Тоҷикистон ҷамъбасти мусобиқаҳо барои Ҷоми Осиё дар Алмаато 15 май дар назар аст. Тоҷикистонро дар ин мусобиқа 13 варзишгар намояндагӣ мекунанд, ки 5 нафарашон наврас мебошанд.
Дар маҷмуъ дар мусобиқаи Ҷоми осиёии ҷудо ҷамъан 500 варзишгар аз ҷумҳуриҳои Тоҷикистон, Ӯзбекистон, Қазоқистон, Туркманистон ва Қирғизистон иштирок мекунанд.
Қаблан чунин мусобиқа моҳи гузашта дар Тошканд сурат гирифт ва ҷудочиёни тоҷик соҳиби як медали нуқра ва ду биринҷӣ гардиданд.
Медали нуқраро Иброҳим Элмуродов ба даст овард, ки ӯ дар вазни зиёда аз 100 кило баромад кард. Медалҳои биринҷиро Нуралӣ Эмомалӣ ( 66 кг) ва Масъуд Аҳмадзода (то 73 кг) ба даст оварданд.