ДУШАНБЕ, 2 май — Sputnik. Вячеслав Володин, раиси Думаи давлатӣ гуфт, ҳамаи сарони давлатҳое, ки тасмим гирифтаанд, ба Украина силоҳ диҳанд, бояд ҳамчун ҷинояткорони ҷангӣ ба ҷавобгарӣ кашида шаванд.
"Роҳбарони як қатор давлатҳои аврупоӣ бо сарварии Олмон метавонанд халқҳои худро ба мушкилоти бузург кашанд. Онҳо бо таъмини силоҳ ба Украина ҷонибдори низоъ мешаванд... Ҳамаи сарони давлатҳо, ки тасмим гирифтанд, Украинаро бо силоҳ таъмин кунанд,худро доғдор кардаанд ва бояд ҳамчун ҷинояткорони ҷангӣ ба ҷавобгарӣ кашида шаванд", - навиштааст Володин дар канали Telegram-и худ.
Ба гуфтаи ӯ, ҳашт сол пеш фашистон дар Одесса мардуми осоиштаро оташ заданд, сарони давлатҳо хомӯш буданд ва барои ҳифзи мардуми Донбасс ҳеҷ коре накарданд, аммо “ҳоло ҳама кореро мекунанд, ки русҳо дар Украина кушта шаванд".
Володин афзуд, ки онҳо низ фоҷиаи Ҷанги Дуюми Ҷаҳонӣ ва қиматеро, ки барои аз фашизм озод кардани ҷаҳон пардохта мешуд, фаромӯш карданд.
Вай ҳамчунин таъкид кард, ки хотираи кӯтоҳи таърихӣ метавонад боиси мушкилоти бузург гардад ва сарони давлатҳо бо амали худ ҷаҳонро ба як фалокат тела медиҳанд.
Ёдовар мешавем, ки Русия рӯзи 24 феврал амалиёти вижаро дар Украина оғоз кард. Кишвардори Русия Владимир Путин ҳадафи онро "ҳимояи одамоне номид, ки тӯли 8 сол аз сӯи режими Киев мавриди таҳқиру наслкушӣ қарор гирифтаанд".
Барои ин, ба гуфтаи ӯ, дар назар аст, ки "нозизудоӣ ва ғайринизомикунонии Украина" анҷом дода, тамоми масъулини "ҷиноятҳои хунини зидди мардуми осоишта" дар Донбасс ба ҷавобгарӣ кашида шаванд.