ДУШАНБЕ, 27 апр — Sputnik. Вазорати умури дохилии Тоҷикистон садамаи маргбор дар ноҳияи Данғараро, ки боиси модару кӯдаки навзод шудааст, натиҷаи ноуҳдабароии ронандаи "BMW-X5" арзёбӣ кардааст.
ВУД мегӯяд, ронандаи 31-солаи автомашинаи тамғаи "BMW-X5", сокини шаҳри Душанбе ҳангоми ҳаракат аз самти шаҳри Кӯлоб ба сӯйи пойтахт, дар ҳудуди ҷамоати деҳоти Себистони ноҳияи Данғара аз уҳдаи идораи воситаи нақлиёт набаромадаст.
Дар натиҷа ба самти муқобили роҳ баромада, ба автомашинаи тамғаи “ВАЗ-21013”, ки таҳти идораи ронандаи 23-сола, сокини шаҳри Норак қарор дошт, бархӯрдааст.
Дар натиҷа ронандаи автомашинаи тамғаи “ВАЗ-21013” ҷароҳати ҷисмонӣ бардошта, дар беморхона бистарӣ гардидааст.
Бо таассуф зикр шудаст, ҳамсари ронанда ва ва фарзанди хурдсолаш, ки ҳамроҳаш дар мошин қарор доштаанд, дар ҷои ҳодиса ба ҳалокат расидаанд.
Вазорати умури дохилии Тоҷикистон афзуд, феълан аз рӯи ин ҳодиса таҳқиқиот идома дорад.
Қаблан масъулини роҳу нақлиёти Тоҷикистон дар феҳрасти омилҳои асосии сар задани садамаҳои нақлиётӣ дар ҷумҳурӣ, аз ҷумла риоя накардани аломатҳои роҳ, ҳолати техникӣ, ҳолати роҳҳо, бо суръати баланд рондани автомобил, муқобили самти ҳаракат баромадани баъзе ронандагон, идораи мошин дар ҳолати сархӯшӣ, бидуни аз худ накардани нозукиҳои касбӣ гирифтани шаҳодатномаи ронандагӣ арзёбӣ мекунанд.