ДУШАНБЕ, 12 апр — Sputnik. Муовини вазири корҳои хориҷии Тоҷикистон Фарҳод Салим бо сафири Арабистони Саудӣ дар Тоҷикистон Валид ибни Абдурраҳмон Ар-Рушайдон дидору мулоқот кард.
Дар ин бора Вазорати корҳо хориҷии Тоҷикистон хабар медиҳад.
Гуфта мешавад, ки дар рафти ин вохӯрӣ ҷонибҳо перомуни ҳолати кунунии муносибатҳои дуҷониба, дурнамои густариши ҳамкорӣ байни кишварҳо ва дигар масъалаҳои мавриди таваҷҷуҳи муштаракро баррасӣ кардаанд.
Ҳамчунин ҷонибҳо дар мавриди Конфронси дуюми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” гуфтугӯ кардаанд.
Ин ҳамоиш таҳти унвони “Такон бахшидан ба амалҳо ва шарикӣ дар соҳаи об дар сатҳҳои маҳаллӣ, миллӣ, минтақаӣ ва ҷаҳонӣ” баргузор мешавад.
Замон ва макони баргузории ҳамоиш 6-9 июни соли 2022 дар шаҳри Душанбе гуфта мешавад.
Ҳамин тавр дар ин росто сафири Арабистони Саудӣ ба омодагии кишвараш барои иштирок дар чорабинии мазкур дар сатҳи муносиб таъкид кардааст.