ДУШАНБЕ, 18 мар — Sputnik. Ҳаҷми истеҳсоли маҳсулоти саноатӣ дар Тоҷикистон дар 2 моҳи соли равон нисбат ба ҳамин давраи соли 2021 бо арзиши муқоисавӣ 12,4% афзоиш ёфтааст.
Бино ба маълумоти Вазорати саноат ва технологияҳои нави кишвар, афзоиши ҳаҷми он беш аз 6,2 миллиард сомонӣ (484,3 миллион доллар) аст.
Ин ниҳоди давлатӣ мегӯяд, далели рушди бештар истихроҷи бештар (19,5 фоиз) ва фароварии санъатӣ (18,9) будааст.
Ҳаҷми истеҳсоли нерӯи барқ аз аввали сол беш аз 3,7 миллиард киловат-соатро ташкил дод. Ин нишондиҳанда нисбат ба январ-феврали соли 2021 9,8 дарсад бештар гуфта мешавад.
Дар нерӯгоҳҳои барқи обии Тоҷикистон беш аз 3,2 миллиард киловатт-соат барқ тавлид кардаанд. Дар Маркази барқу гармдиҳӣ ин нишондиҳанда 568,9 миллион кВт-соат нерӯи барқро ташкил дод.
Ёдовар мешавем, қаблан хабар дода шуда буд, ки Тоҷикистон бори аввал дар таърихаш дар тиҷорат ба мизони баланд ноил шудааст: содирот беш аз 2 миллиард доллар арзёбӣ шуд.
Дар соли 2021 аз Тоҷикистон аз ҳама бештар ашёи хом содир шуда буд. Металҳои қиматбаҳо ва нимқиматбаҳо ба маъруфтарин маҳсулот табдил шудаанд. Онҳо наздик ба 40 дарсади содироти ашёи хомро ташкил медиҳанд.
Дар ҷои дувум маъданҳо ва консентратҳо (16 фоиз), сипас пахта (9,5%) ва алюминий (6%) қарор гирифтаанд.