ДУШАНБЕ, 14 мар — Sputnik. Теъдоди қурбониёни ошӯбҳои моҳи январ, ки тақрибан дар саросари Қазоқистон рух дод, тағйир ёфт.
Ба гуфтаи додситони кулли ин ҷумҳурӣ Берик Алисов, 230 нафар қурбони ҳамлаҳои террористӣ шудаанд.
"Дар маҷмуъ дар кишвар 230 нафар, аз ҷумла 19 афсари низомӣ ва амниятӣ ҷон бохтанд", - гуфт ӯ дар ҷаласаи умумии палатаи поёнии парлумон.
Қаблан мақомоти Қазоқистон дар пайи ҳаводиси январӣ аз 4578 маҷрӯҳ ва 225 ҳалокшуда, аз ҷумла 19 маъмури амниятӣ хабар дода буданд.
Ёдовар мешавем, ки тазоҳуроти оммавӣ дар Қазоқистон дар авоили январи соли 2022 оғоз шуда буд. Сабаби баргузории гирдиҳамоӣ ду баробар боло рафтани нархи гази моеъ гуфта мешуд.
Комиссияи ташкилшудаи ҳукуматӣ омодагии худро барои кам кардани нарх эълон кард, аммо эътирозҳо дар шаҳрҳои дигар паҳн шуданд. Дере нагузашта он ба бетартибӣ ва бархӯрдҳои мусаллаҳ печид.
Дар пасманзари тезутунд шудани вазъ дар Қазоқистон вазъияти изтирорӣ ва соати комендантӣ ҷорӣ ва чорабиниҳои оммавию фурӯши аслиҳа манъ шуд.
Илова бар ин бо дархости Тоқаев нерӯҳои дастаҷамъии СПАД ба қаламрави ин кишвар ворид карда шуданд.
Субот дар ин ҷумҳурӣ ба шарофати амали нерӯҳои амнияти миллӣ ва посдорони сулҳи Русия, Тоҷикистон, Арманистон ва Беларус таъмин гардид.
Тибқи ҳисобҳои ниҳодҳои марбута, хисорот аз ошӯб дар Қазоқистон беш аз 2 миллиард долларро ташкил додааст.
Вазорати хориҷаи Русия рӯйдодҳои ин ҷумҳуриро як кӯшиши аз берун дастгириёфта, бо зӯр халалдор кардани амният ва якпорчагии давлат арзёбӣ карда буд.