ДУШАНБЕ, 8 мар — Sputnik. Владимир Мединский, ёвари раисҷумҳури Русия, ки роҳбарии ҳайати ин кишвар дар музокирот бо Украинаро ба уҳда дорад, умедвор аст, дар масъалаи Қрим ва Донбасс роҳи ҳаллро пайдо хоҳанд кард.
Барои Русия эътирофи Қрим ва ҷумҳуриҳои Донбасс аҳамияти аввалиндараҷа дорад, изҳор доштаст Мединский дар суҳбат бо RT.
Ба гуфтаи ӯ, ҷониби Украина ин корро тақрибан ғайриимкон хонд.
"Онҳо мегӯянд, ин тақрибан ғайриимкон аст. Аммо ба назари ман, байни "ғайриимкон" ва "тақрибан ғайриимкон" фарқи калонест", - такъид намудааст ёвари президенти Русия.
Вай бо зикри аҳамияти аввалиндараҷаи ин масъала барои Маскав изҳори умед намудааст, ки "дер ё зуд мо роҳи ҳаллро пайдо хоҳем кард".
Маврид ба зикр аст, ки то ҳол се даври музокирот - рӯзҳои 28 феврал, 3 ва 7 март дар қаламрави Беларус баргузор шуданд. То ҳол ҷонибҳо аз тавофуқот барои ташкили долонҳои гуманитарӣ ҷиҳати тахлияи минтақаҳои даргир аз аҳолии осоишта, интиқоли дору ва маҳсулоти ниёзи аввал хабар доданд.
Даври чоруми гуфтушунид дар ояндаи наздик баргузор хоҳад шуд, изҳор дошт раиси Кумитаи Думаи давлатӣ дар умури байналмилалӣ ва узви ҳайати Русия дар музокирот бо Украина Леонид Слутский.
Музокирот дар пасманзари амалиёти низомии Русия дар Украина сурат мегирад, ки аз 24 феврал то ҳол идома дорад.