ДУШАНБЕ, 26 фев — Sputnik. Вячеслав Володин, раиси Думаи давлатии Русия мегӯяд, президенти Украина Владимир Зеленксий шаҳри Киевро тарк кардааст.
Зеленский аллакай рӯзи 25-уми феврал дар Киев қарор надошт, хабар дод РИА "Новости" аз қавли Володин. Ӯ таъкид намудааст, наворҳоеро, ки президент нашр мекунад, қаблан сабт шудаанд. Макони нави будубоши Зеленский ва атрофиёнаш шаҳри Лвов гуфта шудааст.
"Ӯ аллакай рӯзи гузашта дар пойтахти Украина қарор надошт. Бо атрофиёнаш ба шаҳри Лвов гурехт. Дар он ҷо барои ӯ ва ёваронаш макони иқомат муҳайё шудааст", - гуфтаст Володин.
Раиси Думаи давлатии Русия изҳор доштаст, ки ин иттилоъро аз вакилони Радаи Олӣ гирифтаст, ки талош доштаанд, бо роҳбари давлат дар Киев мулоқот кунанд. Аммо онҳоро ба Лвов даъват кардаанд.
Ин дар ҳолест, ахиран президенти Украина навореро нашр кард, ки дар он ҳамроҳои сарвазири ин кишвар Денис Шмигал, роҳбари дафтари президент Андрей Ермак ва мушовир Михаил Подоляк дар Киев қарор доштанд.
Маврид ба зикр аст, ки 21 феврал Русия мустақилияти ҷумҳуриҳои халқии Донетск ва Луганскро эътироф карда, созишномаи дӯстӣ бо онҳоро ба тасвиб расонд.
Дар пайи ин Путин 24 феварал аз тасмимаш барои оғози амалиёти низомӣ дар Украина хабар дода, афзуд, ки "вазъият иқдоми фаврӣ ва қотеъро талаб мекунад". Ӯ афзуд, ки Донетску Луганск барои кумак ба Русия муроҷиат кардаанд.
Ба гуфтаи Путин Маскав нияти ғасби қаламрави Украинаро надорад, танҳо мехоҳад ҳудуди ин кишварро ғайринизомӣ созад.