ДУШАНБЕ, 26 фев — Sputnik. Зани 47-сола, сокини ноҳияи Бобоҷон Ғафуров ба идораи милиса дар шаҳри Хуҷанд муроҷиат карда, арз доштааст, ки туъмаи марди тамаъкор шудааст.
Ба иттилои ВУД, муроҷиаткунанда изҳор доштааст, ки марди 37-сола, сокини ноҳияи Бобоҷон Ғафуров бо таҳдиди ифшои маълумоти беобрӯкунанда, аз ӯ 15 ҳазор сомонӣ талаб дорад.
Манбаъ афзуд, ки марди муттаҳам ҳангоми гирифтани 1,5 ҳазор сомонӣ аз ҷабрдида боздошт гардид.
Мақомот мегӯянд, феълан аз рӯи ин ҳодиса бо моддаи 250, қисми 1-и Кодекси ҷиноии Тоҷикистон парванда оғоз карда шуда, тафтишот идома дорад.
Ин банди Кодекси ҷиноӣ барои тамаъҷӯӣ бо таҳдиди бадномкунӣ аз 5 то 10 соли зиндонро пешбинӣ кардааст.
Чунин ҳолатҳои тамаъкорӣ дар Тоҷикистон қаблан низ ба қайд гирифта шуданд. Аз ҷумла ахиран дар Душанбе марди 31-сола боздошт гардид, ки бо роҳи фиреб ба боварии ҷавонзани 25-сола даромада, ӯро аз тариқи телефони мобилӣ навори видеоӣ ва аксбардорӣ кардааст.
Манбаъ афзуд, ки баъдан марди муттаҳам аз ҷавонзан 10 ҳазор сомонӣ талаб карда, ӯро таҳдид намудааст, ки дар сурати надодани маблағ наворҳои бараҳнаи занро ба хешовандони наздикаш, аз ҷумла бародараш нишон медиҳад.
Муттаҳами мазкур низ боздошт гардида, таҳқиқи парвандаи ҷиноӣ алаҳйи ӯ идома дорад.