ДУШАНБЕ, 24 фев — Sputnik. Мария Захарова, намояндаи расмии Вазорати умури хориҷии Русия дар шарҳи авзоъ дар атрофи Украина гуфт, ки ин оғози ҷанг нест, балки ин кӯшиши ҷилавгирӣ аз ҷанги ҷаҳонӣ мебошад.
"Ин оғози ҷанг нест. Аввалан ин хеле муҳим аст. Талоши мо пешгирӣ аз ташаннуҷи вазъ аст, ки метавонад ба ҷанги ҷаҳонӣ табдил ёбад. Ва дувум, ин анҷоми ҷанг аст", - гуфт хонум Захарова дар шабакаи телевизионии НТВ.
Владимир Путин, раисҷумҳури Русия ахиран эълон кард, ки дар бораи амалиёти вижаи низомӣ алайҳи Украина тасмим гирифтааст.
Дар як паёми телевизионӣ ба мардуми Русия ӯ гуфт, ки вазъият "аз мо иқдоми қатъӣ ва фаврӣ тақозо мекунад, ҷумҳуриҳои мардумии Донбасс аз Русия кумак хостанд".
Раисҷумҳури Русия изҳор дошт, ки тамоми масъулияти хунрезӣ бар дӯши режими ҳозираи Украина гузошта мешавад ва аз низомиёни украинӣ даъват кард, ки фармонҳои ҷиноии мақомоти Украинаро иҷро накунанд, силоҳҳои худро ба замин гузоранд ва ба хонаҳои худ раванд.
Вазорати дифои Русия хабар дод, ки нерӯҳои артиши Русия ба шаҳрҳои Украина ҳеҷ гуна зарбаи мушакӣ, ҳавоӣ ва тӯпхонаӣ назадааст.
Ба гуфтаи ин ниҳод, танҳо инфрасохтори низомӣ, иншооти дифои ҳавоӣ, фурудгоҳҳои низомии нерӯҳои низомии Украина аз тариқи силоҳи ҳушманд нобуд шудаанд.
Вазорат дифоъ илова кард, ки ба мардуми осоишта ҳеҷ таҳдиде нест.