ДУШАНБЕ, 16фев — Sputnik. Иброҳими Раисӣ, раисҷумҳури Эрон, ки аз Қатар дидан кард, дар як нишасти хабарии муштарак бо Тамим бин Ҳамад Оли Сонӣ, амири Қатар гуфт, ки ҳамсояҳои Афғонистон бояд ба тамоми мардум ва қавмҳо дар ташкили ҳукумати фарогир дар Афғонистон кумак кунанд.
Вай таъкид кард, ки дар сурати мавҷуд набудани чунин ҳукумат нооромиҳо дар Афғонистон идома хоҳанд ёфт.
Раисҷумҳури Эрон дар бахши дигари суханронии худ гуфтааст, ки бо амири Қатар дар бораи масоили минтақаӣ, мубориза бо терроризм ва маводи мухаддир гуфтугӯ кардааст.
Раисҷумҳури Эрон бар таъсиси як ҳукумати мардумии фарогир дар Афғонистон таъкид кард, аммо ҳукумати толибон то ҳол талабҳои ҷомеаи байналмилалиро дар ин замина иҷро накардааст.
Қаблан дабири кулли СММ гуфта буд, ки ҳукумати якқавмӣ мушкилоти кунунии мардуми Афғонистонро ҳал намекунад.
Толибон мегӯянд, ки ҳукумати сарпарасти онон дар Кобул ҳамашумул аст ва агар ҳадаф аз фарогир будани давлат шомил будани мақомҳои ҳукумати пешин бошад, имкон надорад.
Ёдовар мешавем, ки дар бораи ташкили ҳукумати ҳамашумул мақомоти Тоҷикистон низ борҳо таъкид кардаанд. Ин мавзуъро Эмомалӣ Раҳмон дар дидори ахир бо Иброҳими Раисӣ, раисҷумҳури Эрон дар шаҳри Душанбе матраҳ карда буд.