ДУШАНБЕ, 14 фев – Sputnik. Додгоҳи варзишии арбитражӣ - СAS, қарор кард, ки варзишкори Русия, Камила Валиева ҳунрамоиро дар Бозиҳои олимпии 2022 идома диҳад.
Додгоҳ бо нашри як иттилоия гуфт, дархости Кумитаи байналмилалии олимпӣ, Иттиҳоди байналмилалии конкитозон ва Ожонси ҷаҳонии зиддидопингӣ дар мавриди варзишкор Камила Валиева рад карда шуд.
Қаблан Ожонси байналмилалии санҷиши допинг - ITA хабар дод, ки ташхиси Валиева аз 25 декабри соли 2021 мусбат буда, дар баданаш маводи триметазидин ошкор карда шудаст. Ин натиҷаро лабораторияи зиддидопингӣ дар Стокҳолм 8 феврал ироа намуд.
Дар пайи ин Ожонси русиягии зиддидопингӣ Валиеваро муваққатан аз мусобиқаҳо барканор карду баъди шикояти апелятсионии варзишкор 9 феврал маҳдудиятро лағв намуд.
Кумитаи байналмилалии олимпӣ, Иттиҳоди байналмилалии конкитозон ва Ожонси ҷаҳонии зиддидопингӣ алайҳи ин қарор ба Додгоҳи варзишии арбитражӣ шикояти эътирозӣ карданд. Додгоҳ дар шоми якшанбеи 13 феврал дар пайи баррасии 7-соатӣ эътирозҳоро рад намуда, барои идомаи сабқати Валиева дар мусобиқаҳои инфиродӣ иҷозат дод.
Қаблан Валиева дар ҳайати тими мунтахаби Русия дар мусобиқаи даставӣ қаҳрамони олимпӣ шуд, аммо маросими ҷоизасупорӣ баргузор нагардид. Барномаи кӯтоҳ ва мусобиқаи инфиродӣ миёни занон дар Бозиҳои олимпии Пекин 15-уми феврал дар назар аст.