Духтарон, хонандагони синфҳои ибтидоӣ дар навоҳии дурдасти Бадахшон дар рӯзҳои сард ва барфи зимистон бо ҳавас ба мактаб мераванд.
Ёдрас менамоем, ки Воҳидуллоҳ Ҳошимӣ, мудири барномаҳои хориҷӣ ва кумакҳои Вазорати маорифи ҳукумати толибҳо қаблан гуфта буд, ки ҳама духтарон дар ояндаи наздик ба макотиб бармегарданд ва ба зудӣ бахшномаи ҷадид дар саросари кишвар содир хоҳад шуд.
“Мутахассисони мо рӯи он кор мекунанд ва мо ба зудӣ онро ба ҷомеаи ҷаҳонӣ эълон хоҳем кард", - афзуд ӯ.
Ӯ дар идома гуфт: "Толибҳо муваззафанд, ки духтаронро таълим диҳаду талош доранд, роҳҳои бозгардонидани онҳоро ба мактаб пайдо намоянд ва ҳеҷ як омӯзгори зан аз кор барканор нашудааст. Ин паёми мусбат ба ҷаҳониён аст, ки мо рӯи механизми он кор мекунем ва ба дунболи ҳазфи онҳо аз макотиб ва донишгоҳҳо нестем".
Ҳошимӣ таъкид кард, ки омӯзиш мисли дигари заминаҳои давлатӣ аст, ки дар асари қатъ шудани ғайримунтазираи ҳимояти хориҷӣ дар пайи фурӯпошии давлати собиқ мутазаррир мешавад.
"Агар онҳо воқеан мехоҳанд, духтаронро дар мактабҳо бубинанд, бояд ҳоло ба мо кумак кунанд", - гуфт ӯ.
Ҳошимӣ дар масъалаи таҳсили духтарон гуфт, Вазорати маориф бар рӯи як равиши нав дар мактабҳо кор мекунад, то онро бо усулҳои исломӣ ва фарҳанги дохилию меъёрҳои байналмилалӣ мутобиқ созад.