ДУШАНБЕ, 27 янв — Sputnik. Дар ҳоли ҳозир аз сӯйи Қирғизистон тирборони рустоҳои марзӣ дар шимоли Тоҷикистон идома дорад, хабар медиҳад Кумитаи давлатии амнияти миллии ҷумҳурӣ.
Ин ниҳод тавзеҳ додааст, ки тирандозӣ ба сӯйи сокинони маҳаллӣ, мошинҳо ва иншооти гуногуни зерсохторӣ сурат мегирад.
"Тирборони шадид идома дорад. Постгоҳҳои сарҳадӣ аз миномётҳо тирандозӣ карда мешаванд", - гуфт манбаъ.
Илова бар ин Кумитаи давлатии амнияти миллии Тоҷикистон гуфтааст, ки парвози ҳавопаймоҳои бесарнишин дар ҳудуди рустоҳои Суғд, ки ҳарими ҳавоӣ дар марзро вайрон кардаанд, сабт шудааст.
Ин ниҳод гуфтааст, ба манотиқи наздисарҳадии вилояти Бодканд кӯчонидани ҷузъу томҳои ҷудогона, ҷузъу томҳои ҳарбӣ ва техникаи ҳарбӣ мушоҳида мешавад.
"Айни замон аз ҷониби Ҷумҳурии Қирғизистон ба самти Ҷумҳурии Тоҷикистон, ба сӯйи сокинони маҳаллӣ, воситаҳои нақлиёт ва иншооти гуногуни инфрасохторӣ тирборони шадид идома дорад. Дидбонгоҳои наздисарҳадӣ аз миномётҳо тирборон карда мешаванд",- афзуд КДАМ.
Таъкид шудааст, ки айни замон ҷониби Қирғизистон бо мақсади пинҳон кардани амалҳои ғайриқонунии худ оммаро бо маълумоти бардурӯғ, фейкӣ дар ВАО ва манбаҳои гуногуни интернетӣ фаъолона коркард ва паҳн мекунад.