ДУШАНБЕ, 17 янв — Sputnik. Кумитаи кор бо ҷавонон ва варзиши назди Ҳукумати Тоҷикистон бо нашри як иттилоия кӯчиданашро ба суроғаи ҷадид таъйид кард.
Ба иттилои кумита, бо фармоиши ҳукумат биноҳои Вазорати молияи ҷумҳурӣ барои истифодаи минбаъда ба тавозуни Кумитаи кор бо ҷавонон ва варзиш гузаронда шуданд.
Манбаъ афзуд, ки макон ва суроғаи фаъолияти минбаъдаи Кумитаи кор бо ҷавонон ва варзиш аз кӯчаи Спортивная 6-и ноҳияи Синои шаҳри Душанбе ба кӯчаи Академикҳо Раҷабовҳо 3-и ноҳияи Шоҳмансур иваз карда шуд.
Маврид ба зикр аст, ки Вазорати молияи Тоҷикистон моҳи августи соли равон, дар арафаи таҷлил аз 30-юмин солгарди истиқлоли давлатӣ дар маркази пойтахт, дар наздикии Қасри миллат соҳиби бинои ҷадид гардид.
Бинои нави Вазорати молия дар кӯчаи Фотеҳ Ниёзии ноҳияи Исмоили Сомонӣ бо иштироки раисҷумҳури Тоҷикистон Эмомалӣ Раҳмон ифтитоҳ шуда буд. Бинои нав барои кормандони бахши молияи кишвар аз 11 ошёна, ду даромадгоҳи асосӣ ва ҳафт даромадгоҳи ёридиҳанда иборат мебошад.