ДУШАНБЕ, 12 янв – Sputnik. Ширкати миллии барқи Афғонистон (DABS) иддао дорад, ки Ӯзбекистон содироти нерӯи барқро ба ин кишвар бидуни огоҳӣ 60 дарсад коҳиш додааст. Дар ин бора рӯзи чаҳоршанбе шабакаи телевизионии "Ariana News" хабар дод.
Ба гуфтаи ин ширкат, ҷониби Ӯзбекистон ин вазъро ба "мушкилоти фаннӣ" рабт додааст. Ӯзбекистон изҳор доштааст, ки чунин мушкил дар нерӯгоҳи "Марҷон" рух дода, бинобар ин содирот кам шудааст.
Дар ҳамин ҳол ширкат тавзеҳ додааст, ки дар ояндаи наздик ин мушкил бартараф ва Афғонистон дар ду-се рӯзи наздик бо нерӯи барқ таъмин мешавад. Ҷониби Ӯзбекистон ҳам зикр намудааст, ки барои таъмир вақти зиёд лозим нест.
Аммо Ширкати милли барқи Афғонистон афзуда, феълан 16 вилояти ин кишвар бинобар коҳиши содироти барқ аз сӯи Ӯзбекистон бидуни рӯшноӣ мондаанд. Илова бар ин дар тамоми қалмрави Афғонистон давра ба давра интиқоли барқ қатъ мегардад.
Афғонистон бештари нерӯи барқи худро аз кишварҳои Осиёи Марказӣ, бахусус аз Ӯзбекистону Тоҷикистон мехарад.