ДУШАНБЕ, 12 янв — Sputnik. Русия ҳам барои музокирот дар ҷиҳати қатъи даргириҳо дар Донбасс омодааст, аммо бояд аввал созишҳои пешӣ амалӣ гарданд, хабар дод РИА "Новости" аз қавли Дмитрий Песков, сухангӯи Кремл.
"Русия омода мебошад, аммо дар навбати аввал зарур аст, ки тавофуқоти қаблан ҳосилшуда иҷро шаванд. Бор кардани созишҳои нави иҷронашаванда ба тавофуқоти қаблии иҷронашуда ба фикри мо таҷрибаи хуб нест", - изҳор дошт сухангӯи раисҷумҳури Русия.
Ӯ зимни шарҳи мулоқоти эҳтимолии чоргонаи нормандӣ изҳор дошт, ки ишораҳо ба ин вохӯрӣ ҳич гоҳ аз байн нарафтаанд. Аммо мушахассот дар мавриди замони баргузории он ба далоиле, ки зикр шудаанд, маълум нестанд, илова намуд Песков.
Ин дар ҳолест, ки Владимир Зеленский, президенти Украина ахиран гуфт, вақти он фаро расидааст, ки барои коҳиши ҳадафмандонаи ташаннуҷ дар Донбасс созиш шавад.
"Мо барои қабули қарорҳои зарурӣ дар мулоқоти нави роҳбарони кишварҳои чоргона омодаем", - хабар дод дафтари матбуотии президенти Украина аз қавли Зеленский.
Мухолифатҳо дар шарқи Украина беш аз 7,5 соли охир идома доранд, ки ба иттилои СММ, зиёда аз 13 ҳазор нафар қурбонӣ бар ҷой гузоштаанд.
Роҳҳои ҳалли ин мушкилро "Чоргонаи нормандӣ" баррасӣ дорад, ки аз Русия, Украина, Олмон ва Фаронса иборат мебошад. Солҳои 2015-2016 тарафҳо сари аломатгузорӣ созиш карданду дар шаҳри Минск созишнома ба имзо расид. Дар мулоқоти ахири сарони кишварҳои узв, ки дар Порис моҳи декабри соли 2019 баргузор гашт, қарор шуд, ки созишномаи Минск заминаи асосӣ барои идомаи кор дар ин замина боқӣ монад.
Ин санад қатъи оташбас, қафо бурдани аслиҳаи вазнини ҷангӣ аз хатти баҳамоӣ ва гузарондани ислоҳоти конститутсиониро пешбинӣ мекунад.