ДУШАНБЕ, 11 янв — Sputnik. Кумитаи тандурустии вилояти Волгогради Русия пизишки тоҷик, мутахассиси беҳушӣ ва муроқибатҳои вижа (анестизиолог-реаниматолог) Илҳом Худобердиевро бо ифтихорнома қадрдонӣ кард.
Худобердиев дар саҳифааш дар Instagram акси ифтихорномаро нашр кардааст.
"Ифтихорнома ба Худобердиев Илҳом - пизишки мутахассиси беҳушӣ ва муроқибатҳои вижаи шуъбаи асабшиносии табобатхонаи Марказии ноҳиявии Михайловская барои меҳнати софдилонаи чандинсола дар соҳаи тандурустии вилояти Волгоград супорида мешавад".
Илҳом Худобердиев аз соли 2018 ба ин сӯ дар Беморхонаи марказии ноҳияи Михайловкаи вилояти Волгоград ба ҳайси пизишки мутахассиси беҳушӣ ва муроқибатҳои вижа кор мекунад.
Аз оғози ҳамагирии коронавирус, пизишки тоҷик дар "минтақаи сурх" - и беморхона фаъолият карда бар зидди ин вабои аср мубориза мебарад.
Худобердиев хатмкардаи Донишгоҳии тиббии Тоҷикистон ба номи Абуалӣ ибни Сино мебошад.
Соли 2016 дар Донишгоҳи Дӯстии Халқҳои Маскав бахши ординатураро поён бурда, дар беморхонаҳои марказии пойтахти Русия таҷрибаомӯзӣ кардааст.
Илҳом Худобердиев 1 октябри соли 1989 дар ноҳияи Рӯшони Вилояти Мухтори Кӯҳистони Бадахшон дар хонаводаи табиб ба дунё омадааст. Ӯ оиладор ва соҳиби ду фарзанд аст.