ДУШАНБЕ, 6 янв — Sputnik. Раиси шаҳри Душанбе дархост барои анҷоми санҷишро унвонии Ожонси назорати давлатии молиявӣ ва мубориза бо коррупсия равон кардааст.
Дар ин бора дафтари матбуоти шаҳрдорӣ, бо нашри як иттилоия хабар дод.
Ба иттилои манбаъ, ҳадафи Рустами Эмомалӣ аз гузарондани санҷиш таъмини шаффофият мебошад. Аз ҷумла аз Ожонси зидди фасод дархост шудааст, ки шаффофияту самаранокии истифодаи мақсадноки маблағҳои буҷетии мақомоти иҷроияи ҳокимияти давлатии шаҳри Душанберо санҷанд.
Санҷиши фаъолияти молиявию хоҷагидории мақомот дар соли 2021 аз бандҳои дигари дархости Рустами Эмомалӣ аз Ожони зидди фасод мебошад.
Маврид ба зикр аст, ки Маҷлиси вакилони халқи пойтахт буҷаи шаҳри Душанбе барои соли 2021-ро аз рӯи даромад ва хароҷот ба маблағи беш аз 2 миллиарду 316 миллион сомонӣ тасдиқ карда буданд.
Рустами Эмомалӣ, ки аз моҳи январи соли 2017 роҳбарии шаҳри Душанберо ба уҳда дорад, мунтазам аз мақомоти зидди фасод даъват ба амал меорад, ки кори мақомоти тобеяшро санҷад то шафофияту самаранокӣ таъмин гардад.