ДУШАНБЕ, 14 дек — Sputnik. Аҳтам Абдуллозода, ноиби президенти Кумитаи миллии олимпии Тоҷикистон бо Иброҳим ибни Муҳаммад Ал-Абдулло, сафири Қатар дар Душанбе густариши ҳамкориҳоро баррасӣ намуд.
Ба иттилои Кумитаи миллии олимпӣ, Иброҳим ибни Муҳаммад Ал-Абдулло аз робитаҳои дуҷонибаи Тоҷикистону Қатар тавсиф намуда, ёддошти тафоҳум миёни кумитаҳои олимпии ду кишварро зикр намудааст.
"Дар мулоқот, аз ҷумла сохтмони як иншооти варзишӣ барои варзиши сабук дар шаҳри Душанбе, ба роҳ мондани машқҳои дастаҷамъии дастаҳои мунтахаби ҳар ду кишвар дар Қатар ва Тоҷикистон баррасӣ гардиданд", - омадааст дар иттилоия.
Тибқи иттилои Кумитаи миллии олимпӣ, Абдуллозода аз робитаҳои дӯстонаи ду давлат изҳори қаноатмандӣ намуда, аз ташаббусҳои Қатар дар олами варзиш зикр намуд. Ба гуфтаи ноиби президенти Кумитаи миллии олимпӣ, Чемпионати ҷаҳон оид ба футбол дар соли оянда Бозиҳои Осиё дар соли 2030 як такони ҷиддӣ дар рушди варзиши минтақа ва ҷаҳон хоҳад шуд.
Маврид ба зикр аст, ки қаблан Қатар бунёди масҷиди бузург дар шаҳри Душанберо сармоягузорӣ кард, ки калонтарин дар кишвар мебошад. Интизор мерафт, ки маросими ифтитоҳи масҷид бо ҳузури амири Қатар баргузор шавад, аммо ин кор то ҳол амалӣ нашудааст.