Шералӣ Кабир мегӯяд, рушди иқтисоди Тоҷикистон тайи 20 соли охир беш аз 7,5 дарсади рушдро нишон медиҳад ва барои нигоҳдории чунин мизон афзоиши иқтидорҳои энергетикӣ ва таъмини нерӯ зарур аст.
Ӯ таъкид намуд, Тоҷикистон ҷонибдори таъмини инфрасохтори энергетикӣ дар сатҳи минтақаӣ мебошад ва кор дар хатти интиқоли барқи CASA-1000-ро муҳим хонд.
Ӯ тавзеҳ дод, ки ҳатто бо иқтидори феълӣ Тоҷикистон дар фасли гармо нерӯи барқи изофии зиёд дорад, ки метавонад ба Афғонистону Покистон интиқол ёбад. Вай таъкид намуд, ки дар Покистон махсусан дар фасли тобистон талабот ба нерӯи барқ зиёд мегардад.
Вазири саноат ва технологияҳои нави Тоҷикистон бархилофи иддаои бархе гидроэнергетикаро сабз арзёбӣ намуд, ки барои тамоми башарият муфид аст.
Ӯ илова намуд, ки дар баробари рушди гидроэнергетика, Тоҷикистон инчунин ба рушди бахшҳои алтернативӣ низ таваҷҷуҳ дорад. Аз ҷумла ӯ иқтидори бузурги нерӯи офтобӣ дар Тоҷикистонро зикр намуд, ки соле ҳудуди 300 рӯзи офтобӣ дорад.