ДУШАНБЕ, 1 дек — Sputnik. Дар ноҳияи Бобоҷон Ғафуров ҷинояти одамкушӣ рух додааст. Кормандони ВУД хабар медиҳанд, ки марди 47-сола бо як бераҳмии махсус аз ҷониби писари худ, ҷавони 19-сола кушта шудааст.
Манбаъ меафзояд, ҷиноят дар манзили истиқоматии ин хонавода рух дод ва сабабашро кормандони ин ниҳод муноқишаи оилавӣ арзёбӣ намудаанд.
Ҷузъиёти бештари ин ҳодиса зикр нашудааст, танҳо қайд гардидааст, ки писари 19-сола дар заминаи муноқишаи ба миёномада бо корд ҳафт маротиба ба узвҳои ҳаётан муҳими падараш зарба зада, ӯро куштааст.
"Ҷабрдида ҷароҳатҳои гуногуни ҷисмонӣ бардошта, дар ҷойи ҳодиса ба ҳалокат расидааст", - омадааст дар хабари вазорат.
ВУД Тоҷикистон мегӯяд, нисбати ин ҷавон, тибқи моддаи 104 (қисми 1)-и Кодекси ҷиноятӣ парвандаи ҷиноӣ боз гардида, тафтишот идома дорад.
Бояд гуфт, ин модда маҳрумият аз озодӣ ба муҳлати аз 8 то 15 солро дар бар мегирад.