ДУШАНБЕ, 26 ноя — Sputnik. Тоҷикистон дар 20-умин Намоишгоҳи байналмилалии таҷҳизоти гармхонаҳо, кишоварзӣ ва чорводории “Growtech-2021” дар Анталия ширкат мекунад.
Ин намоиш дар Туркия аз 24 ноябр оғоз гардида, то фардо идома хоҳад кард.
Ҳайати Тоҷикистон таҳти сарварии мудири кулли Палатаи савдо ва саноати вилояти Суғд Муҳаммадҷон Муҳаммадҷонов барои ширкат ба ин намоишгоҳ рафтааст.
Ба Анталия намояндагони зиёда аз 600 ширкат аз 40 кишвари ҷаҳон ва даҳҳо ҳазор меҳмон аз 130 кишвар омадаанд.
Дар доираи намоиш дар бораи масъалаҳои боғу токдорӣ ва хоҷагии деҳот семинару маҷлисҳо гузаронда мешавад.
Мутахассисони тоҷик тасмим гирифтаанд, ки бо ширкатҳои хориҷӣ тавсеаи равобити тиҷорӣ ва иқтисодиро баррасӣ карда, шарикони нав ва сармоягузоронро пайдо кунанд.
Ба роҳ мондани содироти молу маҳсулот, ошноӣ бо технологияҳои навтарини ҷаҳонӣ дар соҳаи кишоварзӣ низ як масъалаи мубрам барои Тоҷикистон мебошад.