ДУШАНБЕ, 25 ноя — Sputnik. Тибқи гузориши Бонки Авруосиёии Рушд, мизони болои таваррум дар Тоҷикистон ҳамчунон боқӣ мондааст, аммо коҳиши тадриҷии он дар назар аст.
Дар охири моҳи сентябри соли 2021 сатҳи таваррум 9,6% буд. Дар муқоиса бо соли 2020 болоравии нархҳо густардатар шуд.
Аммо ба гузориши БАОР, аз афзоиши шадиди қимати маводи ғизоӣ дар Тоҷикистон ба далели афзоиши тавлидоти кишоварзӣ ҷилавгирӣ шудааст.
Дар ҳамин ҳол нархи бисёре аз молу хидматрасониҳои дигар боло рафтааст. Сабабҳои аслии ин афзоиши қимати сӯзишворӣ дар бозорҳои хориҷӣ ва коҳиши интиқоли гази моеъ аз кишварҳои ҳамсоя ба Тоҷикистон унвон мешавад.
Бино ба маълумоти БАОР, аз аввали соли 2021 ин навъи сӯзишворӣ дар Тоҷикистон 80% гарон шудааст.
Аз нав барқарор шудани интиқоли гази моеъ ба шарофати шартномаҳои нав барои муътадил шудани нархи он ва дигар намудҳои сӯзишворӣ дар кишвар ва дар натиҷа коҳиши сатҳи таваррум дар моҳҳои октябр-ноябри соли 2021 замина фароҳам мешавад.
Бонки Авруосиёии Рушд интизор дорад, ки мизони таваррум дар Тоҷикистон дар солҳои оянда то 6% коҳиш меёбад.