ДУШАНБЕ, 13 ноя — Sputnik. Вазири корҳои хориҷии Тоҷикистон Сироҷиддин Муҳриддин бо Котиби давлатии Вазорати Аврупо ва корҳои хориҷии Фаронса Жан-Батист Лемуан дар Порис дидору мулоқот кард.
Дар ин бора Вазорати корҳои хориҷии Тоҷикистон хабар медиҳад.
Гуфта мешавад, ки дар ин мулоқот, дурнамои ҳамкориҳои мутақобилан судманд байни Тоҷикистон ва Фаронса баррасӣ гардиданду Фаронса шарики муҳими Тоҷикистон арзёбӣ шуд.
"Фаронса дар заминаи муносибатҳои наздик ва дӯстонаи ду кишвар шарики муҳим, боэътимод ва боварибахши Тоҷикистон дар Аврупо хонда шуд", - омадааст дар хабарнома.
Ҷонибҳо ҳамчунин аз натиҷаҳои боздиди президенти Тоҷикистон Эмомалӣ Раҳмон ба Фаронса (аз 12-14 октябри соли 2021) ва муколамаи сатҳи олии дар доираи он анҷомёфта изҳори қаноатмандӣ намудаанд.
Бояд гуфт, Эмомалӣ Раҳмон дар ин сафар масъалаҳои гуногун, аз маориф то иқтисоду сармоягузориро матраҳ кард. Ҳамчунин Раҳмон ва Макрон ба фарогир будани ҳукумати нави Афғонистон таъкид карданд ва дар ин росто ҳамфикр буданд.
Сиёсатмадорон омодагии хешро ба манзури татбиқи зарфиятҳои иловагии таҳкиму ғанисозии равобити ҳарду кишвар таъкид доштанд, омадааст дар хабарнома.