ДУШАНБЕ, 11 ноя – Sputnik. Моҳи декабри соли ҷорӣ Қаҳрамонии бокси ҷаҳон миёни бонувон баргузор намешавад, ҳарчанд қаблан замони баргузории ин мусобиқа мувофиқа шуда буд.
Анҷумани байналмилалии бокси ҳаваскорӣ иллати ба таъхир мондани қаҳрамониро бемории коронавирус арзёбӣ кард.
Манбаъ меафзояд, мусобиқаи мазкур на моҳи декабри соли ҷорӣ, балки моҳи марти соли 2022 дар Туркия баргузор мешавад.
"Шумораи зиёди федератсияҳои миллӣ дар дохили кишварҳояшон бо вазъияти душвору маҳдудиятҳо рӯ ба рӯянд. Ба ин далел Шӯрои мудирони AIBA дар мувофиқа бо Федератсияи бокси Туркия тасмим гирифт, ки Қаҳрамонии ҷаҳон миёни бонувонро ба моҳи марти соли 2022 мавқуф гузорад", - омадааст дар хабари AIBA.
Дар ҳамин ҳол президенти AIBA Умар Кремлев изҳор доштааст, ки лағв шудани қаҳрамонӣ аксари варзишгаронро ноумед мекунад, "зеро онҳо омодагии ҷиддӣ дидаанд".
Ба гуфтаи ӯ, бехатарӣ ва солимии варзишгарон аввалиндараҷа аст ва онҳо хатари идомаи ин қаҳрамониро ба дӯш намегиранд.