ДУШАНБЕ, 21 окт — Sputnik. Пас аз мулоқот дар формати Маскав ҳайати "Толибон"* дар мулоқот бо намояндагони вижаи Русия, Чин ва Покистон ширкат кард.
Сухангӯи Вазорати умури хориҷии Афғонистон Абдулқаҳҳор Балхӣ гуфт, дар ҷараёни мулоқот ҷонибҳо ба мувофиқа расиданд, ки бо ҳукумати нави Афғонистон "ҳамкориро идома диҳанд" ва инчунин дар масъалаи бозкушоии дороиҳои бонкии Афғонистон ҳамкорӣ кунанд.
"Пас аз иштирок дар вохӯрӣ дар формати Маскав ҳайати баландпояи Аморати Исломӣ (низоми сиёсии худхондаи "Толибон"*, - шарҳи идора) таҳти раёсати муовини сарвазир Абдусалом Ҳанафӣ дар як мулоқоти чорҷониба, бо ҳузури намояндагони махсуси Русия, Чин ва Покистон ширкат кард", - навиштааст Балхӣ дар "Твиттер".
Ёдовар мешавем, ки 20 октябр дар пойтахти Русия нишасти Маскав дар бораи Афғонистон баргузор шуд. Дар он намояндагони даҳ кишвари минтақа ва як ҳайати баландпояи "Толибон"* ширкат карданд.
Масъалаҳои асосии ин нишаст баррасии вазъи низомӣ-сиёсии Афғонистон, кумакҳои башардӯстона ва ташкили ҳукумати фарогир буданд.
Муовини раиси ҳукумати муваққатии Афғонистон Абдусалом Ҳанафӣ гуфтушунидро мусбат арзёбӣ кард.
Толибон гуфтаанд, ки ҳукумати ташкилшуда ниҳоӣ нест ва таркиби қудрат тағйир хоҳад ёфт.
* - созмони террористии мамнуъ дар Русия ва Тоҷикистон