ДУШАНБЕ, 26 сен — Sputnik. Наришкин аз омилҳои умедворкунандаро талоши кишварҳои минтақа барои ба эътидол овардани вазъ дар Афғонистон хонд.
Сардори Хадамоти истихбороти хориҷии Русия дар суҳбат бо шабакаи телевизионии RТ, изҳор доштааст, ки эътидоли вазъ дар Афғонистон ва талошҳо барои он аз масоили мубрами кишварҳои минтақа, аз ҷумла давлатҳои Осиёи Марказӣ, Чин, Ҳинд, Эрон, Покистон ва Русия мебошад.
"Дар ин масъала ҳамкорӣ миёни хадамоти истихборотӣ хеле муҳим аст. Ва бояд қайд кунам, ки феълан мо амалан бо ҳамаи кишварҳои зикршуда муколамаи шарикӣ дорем", - изҳор доштааст Наришкин.
Ӯ таъкид намудааст, ки албатта тақдири Афғонистон пеш аз ҳама дар дасти худи афғонҳо мебошад. Ба гуфтаи Наришкин, тамоми кишварҳои минтақа манфиатдори як Афғонистони ором ва рушдкунанда мебошанд.
Ҳукумат дар Афғонистонро созмони "Толибон"* моҳи августи соли равон дар пасманзари хуруҷи нерӯҳои амрикоӣ аз ин кишвар ғасб карда, эълон намуд, ки аморати исломиро ташкил мекунад. Нерӯҳои Ҷабҳаи муқовимати миллии Афғонистон таҳти роҳбарии Аҳмад Масъуд эълон карданд, ки мубориза барои як давлати исломии муътадил, бо риояи мардумсолорӣ ва ҳуқуқи инсон, аз ҷумла занонро идома хоҳанд дод.
* - созмони террористии мамнӯъ дар Тоҷикистон, Русия ва бархе кишварҳои дигар