ДУШАНБЕ, 15 сен — Sputnik. Раисиҷумҳури Белорус, Александр Лукашенко бо сафари корӣ ба Тоҷикистон ташриф овард.
Хабаргузории Ховар менависад, ки кишвардори Белорус ва ҳайати ин кишварро дар фурудгоҳи байналмилалии Душанбе сарвазири Тоҷикистон Қоҳир Расулзода ва дигар шахсони расмӣ пешвоз гирифтанд.
Ҳадафи асосии сафари роҳбари Белорус ба Тоҷикистон иштирок дар иҷлосияи Шӯрои амнияти дастаҷамъии СААД мебошад. Ин иҷлосия рӯзи 16 сентябр, таҳти роҳбарии Президенти Тоҷикистон Эмомалӣ Раҳмон баргузор мешавад.
Манбаъ меафзояд, рӯзи 17 сентябр Александр Лукашенко дар ҷаласаи Шӯрои сарони давлатҳои узви Созмони ҳамкории Шанхай, ки ба 20-умин солгарди таъсисёбии ин созмон бахшида шудааст, ҳамчун роҳбари давлати нозир иштирок менамояд.
Ёдовар мешавем, ки дар нишасти сарони давлатҳои узви СААД кишвардори Русия Владимир Путин иштирок намекунад. Сафари Путин ба далели тамос доштани ӯ бо афроди гирифтори коронавирус лағв шуд. Феълан раисиҷумҳури Русия ба қарантин фаро гирифта шудааст.