ДУШАНБЕ, 27 авг — Sputnik. Ҳукумати Ҷопон дар Вилояти Мухтори Кӯҳистони Бадахшони Тоҷикистон се лоиҳаи иҷтимоиро амалӣ кардааст.
Ҳамин тавр, як рӯз пеш сокинони ҷамоати Абдулвосиеви ноҳияи Рӯшон бо оби ошомиданӣ таъмин шудаанд.
Барои кашидани 8 км лӯлаи оби нӯшокӣ 89,3 ҳазор доллар маблағҳои грантӣ ҷудо карда шуданд.
Лоиҳаи дигар дар деҳаи Баҷуи ҷамоати Пастхуф ба анҷом расид. Дар ин ҷо як маркази нави тиббӣ бо маблағи 45 ҳазор доллар сохта шуд. Маркази тиббии куҳна дар натиҷаи заминларзаи соли 2015 хароб шудааст.
Тарҳи сеюм дар деҳаи Кулумбаи Болои ҷамоати деҳоти Сагирдашти ноҳияи Дарвоз амалӣ карда шуд.
Дар ин ҷо сохтмони маркази тиббӣ ва анбор ба маблағи 44,8 ҳазор доллар ба анҷом расидааст.
Қайд карда мешавад, ки ҳамаи лоиҳаҳо аз ҷониби Ҷопон ҳамчун кумаки башардӯстона ройгон амалӣ карда мешаванд.
Пештар хабар дода шуд, ки мақомоти Ҷопон барои иҷрои се тарҳи тиббӣ дар Тоҷикистон тақрибан 280 ҳазор доллари дигар ҷудо хоҳанд кард.