ДУШАНБЕ, 13 авг — Sputnik. Вазорати умури хориҷии Қирғизистон ба зарурати ҳарчӣ зудтар бекор кардани чораҳои маҳдудкунандаи вуруди шаҳрвандонаш ба Қазоқистон таъкид кард, хабар медиҳад Sputnik Қирғизистон бо такя ба дафтари матбуоти ин вазорат.
Бино ба иттилои манбаъ, дар ин росто бо ташаббуси ҷониби Қазоқистон вохӯрии вазири корҳои хориҷии Қирғизистон Руслан Қазоқбоев ва сафири Қазоқистон Рапиш Жошибоев баргузор шудааст.
Ҷонибҳо доираи васеи масоили мубрами муносиботи Қирғизистону Қазоқистонро дар соҳаҳои сиёсӣ, тиҷоратӣ, иқтисодӣ, фарҳангӣ ва гуманитарӣ ва сарҳадӣ муфассал баррасӣ кардаанд.
"Ҷониби Қирғизистон ба зарурати ҳарчӣ зудтар бекор кардани чораҳои маҳдудкунандаи вуруди шаҳрвандонаш ба Қазоқистон бо мақсади ҳаракати озод ва транзити шаҳрвандон ва мошинҳо аз қаламрави ду кишвар, таъкид кардааст", - омадааст дар хабарнома.
Ин дар ҳолест, ки дар навбати худ тоҷикистониён дар интизори бозкушоии марзҳо бо Қирғизистон ҳастанд.
Рӯзи 12 август, ҷониби Қирғизистон шарти боз кардани марзҳояш бо Тоҷикистонро гуфт.
Ба гуфти котиби Шӯрои амнияти Қирғизистон Марат Имонқулов, марзҳои Қирғизистон пас аз ҳалли мушкилоти сарҳадӣ бо Тоҷикистон боз мешавад.
Ёдовар мешавем, ки марзи Тоҷикистон бо Қирғизистон пас аз муноқишаҳои хунини апрелӣ баста шуд.